ఇంటర్ ఫలితాల్లో సత్తా చాటిన హోమ్ గార్డ్ కుమార్తె: రాష్ట్ర స్థాయిలో 5వ ర్యాంక్ సాధించిన నిమితను అభినందించిన జిల్లా ఎస్పీ....

*ఇంటర్ ఫలితాల్లో సత్తా చాటిన హోమ్ గార్డ్ కుమార్తె: రాష్ట్ర స్థాయిలో 5వ ర్యాంక్ సాధించిన నిమితను అభినందించిన జిల్లా ఎస్పీ...

ఎస్ ఆర్ ఎస్ న్యూస్ :కామారెడ్డి జిల్లా బ్యూరో

కష్టపడి చదివితే విజయాలు వరిస్తాయని హోమ్ గార్డ్ కుమార్తె నిరూపించారు. ఇంటర్మీడియట్ ఫలితాల్లో అసాధారణ ప్రతిభ కనబరిచిన కుమారి బి. నిమితను కామారెడ్డి జిల్లా ఎస్పీ ఎం.రాజేష్ చంద్ర, ఐపిఎస్ ఈరోజు ప్రత్యేకంగా అభినందించి, సత్కరించారు. వివరాల్లోకి వెళ్తే: కామారెడ్డి పోలీస్ స్టేషన్‌లో హోమ్ గార్డ్‌గా విధులు నిర్వహిస్తున్న బి. సిద్దరాములు కుమార్తె బి. నిమిత, ఇంటర్మీడియట్ ద్వితీయ సంవత్సరం ఫలితాల్లో అత్యుత్తమ ప్రతిభను చాటారు. మొత్తం 1000 మార్కులకు గాను 992 మార్కులు సాధించి, తెలంగాణ రాష్ట్ర స్థాయిలో 5వ ర్యాంక్‌ కైవసం చేసుకున్నారు.ఈ అద్భుత విజయం పట్ల జిల్లా ఎస్పీ హర్షం వ్యక్తం చేస్తూ, ఈరోజు జిల్లా పోలీస్ కార్యాలయంలో నిమితను మరియు ఆమె తల్లిదండ్రులను ఘనంగా సత్కరించారు. ఈ సందర్భంగా ఎస్పీ మాట్లాడుతూ... సామాన్య కుటుంబం నుండి వచ్చి, రాష్ట్ర స్థాయిలో ర్యాంకు సాధించడం జిల్లా పోలీసు శాఖకే కాకుండా జిల్లా మొత్తానికి గర్వకారణం.నిమిత సాధించిన ఈ విజయం ఆమె అకుంఠిత దీక్షకు, పట్టుదలకు నిదర్శనం. ఇలాంటి విజయాలు తోటి విద్యార్థులకు, ముఖ్యంగా పోలీస్ కుటుంబాల పిల్లలకు గొప్ప స్పూర్తినిస్తాయి. నిమిత భవిష్యత్తులో మరిన్ని ఉన్నత శిఖరాలను అధిరోహించి, సమాజానికి ఉత్తమ సేవలు అందించాలని ఆకాంక్షించారు.ఈ కార్యక్రమంలో జిల్లా పోలీస్ అధికారులు, సిబ్బంది పాల్గొని విద్యార్థినిని మరియు ఆమె తండ్రి సిద్దరాములును అభినందించారు.