కాంగ్రెస్ నేత గడ్డం చంద్రశేఖర్ రెడ్డికి టీపీసీసీ షోకాజ్ నోటీసు..

కాంగ్రెస్ నేత గడ్డం చంద్రశేఖర్ రెడ్డికి టీపీసీసీ షోకాజ్ నోటీసు..

ఏడు రోజుల్లోగా వివరణ ఇవ్వాలని డీఏసీ ఆదేశం..

పార్టీ వ్యతిరేక చర్యలు, తీవ్ర ఆరోపణలపై క్రమశిక్షణా కమిటీ సీరియస్..

ఎస్ ఆర్ ఎస్ న్యూస్ : కామారెడ్డి జిల్లా బ్యూరో..

తెలంగాణ ప్రదేశ్ కాంగ్రెస్ కమిటీ (టీపీసీసీ) క్రమశిక్షణా చర్యల కమిటీ (డీఏసీ) కామారెడ్డి జిల్లాకు చెందిన కాంగ్రెస్ నాయకుడు, పీసీసీ ప్రధాన కార్యదర్శి గడ్డం చంద్రశేఖర్ రెడ్డికి షోకాజ్ నోటీసు జారీ చేసింది. పార్టీ క్రమశిక్షణను ఉల్లంఘించినందుకు గాను ఈ నోటీసు ఇచ్చినట్లు కమిటీ పేర్కొంది. డీఏసీ చైర్మన్, ఎంపీ డాక్టర్ మల్లు రవి మరియు డీఏసీ ఉపాధ్యక్షుడు శ్యామ్ మోహన్ అనంతుల సంయుక్తంగా ఈ నోటీసును జారీ చేశారు. కామారెడ్డి జిల్లాకు చెందిన పలువురు ప్రజాప్రతినిధుల నుంచి వచ్చిన ఫిర్యాదులు, పార్టీ వ్యతిరేక వ్యాఖ్యలకు సంబంధించిన పత్రికా కథనాలను కమిటీ తీవ్రంగా పరిగణించింది. నోటీసులో పేర్కొన్న ముఖ్యమైన అంశాలు: తీవ్రమైన ఆరోపణలు:చంద్రశేఖర్ రెడ్డిపై పేలుడు పదార్థాల కేసు, మున్సిపాలిటీ పాత సామాను విక్రయించిన కేసు, భూ కబ్జా ఆరోపణలతో పాటు దాదాపు 13 ఎఫ్‌ఐఆర్‌లు, 420 కేసులు ఆధారాలతో సహా కమిటీ దృష్టికి వచ్చాయి. పార్టీ ప్రతిష్ఠకు భంగం: పార్టీకి చెందిన ఒక సీనియర్ నాయకుడిపై చేసిన వ్యాఖ్యలు పార్టీ ప్రతిష్ఠను దిగజార్చేలా ఉన్నాయని డీఏసీ నోటీసులో స్పష్టం చేసింది. ఏడు రోజుల్లోగా సమాధానం ఇవ్వాలి: తనపై వచ్చిన ఈ తీవ్రమైన ఆరోపణలకు సంబంధించి పూర్తి స్థాయి లిఖితపూర్వక వివరణను ఏడు రోజులలోగా,అంటే 11 జూన్ 2026 లోపు డీఏసీకి సమర్పించాలని చంద్రశేఖర్ రెడ్డిని ఆదేశించారు. ఈ నోటీసుతో పాటు ఆయనపై వచ్చిన ఫిర్యాదులు, ప్రాతినిధ్యాల ప్రతులను కూడా జతపరిచినట్లు టీపీసీసీ డీఏసీ వెల్లడించింది. గడువు లోపు చంద్రశేఖర్ రెడ్డి ఇచ్చే వివరణ ఆధారంగా, పార్టీ నియమ నిబంధనల ప్రకారం తదుపరి చర్యలపై కమిటీ తుది నిర్ణయం తీసుకోనుంది.