కామారెడ్డి పట్టణ పెద్ద చెరువు హిందూ స్మశాన వాటికలో సమస్యల విలయతాండవం...

కామారెడ్డి: క్షేత్రస్థాయిలో పరిశీలించిన బీజేపీ మున్సిపల్ కౌన్సిలర్ల బృందం.. కామారెడ్డి పట్టణ పెద్ద చెరువు హిందూ స్మశాన వాటికలో సమస్యల విలయతాండవం.. క్షేత్రస్థాయిలో పరిశీలించిన బీజేపీ మున్సిపల్ కౌన్సిలర్ల బృందం.. కోట్ల నిధులు ఏమయ్యాయి? అధికారుల నిర్లక్ష్యంపై కౌన్సిలర్ల ధ్వజం... ఎస్ ఆర్ ఎస్ న్యూస్ : కామారెడ్డి,మార్చి13,... కామారెడ్డి పట్టణంలోని 8వ వార్డు పరిధిలో గల పెద్ద చెరువు హిందూ స్మశాన వాటిక సమస్యల వలయంలో కూరుకుపోయిందని, కనీస సౌకర్యాలు లేక ప్రజలు తీవ్ర ఇబ్బందులు పడుతున్నారని బీజేపీ మున్సిపల్ కౌన్సిలర్ల బృందం ఆవేదన వ్యక్తం చేసింది. శుక్రవారం నాడు కౌన్సిలర్లు శ్రీధర్ రెడ్డి (8వ వార్డ్), మోటురీ శ్రీకాంత్ (39వ వార్డు) నేతృత్వంలోని బృందం స్మశాన వాటికను సందర్శించి, అక్కడ ఉన్న అధ్వాన్న పరిస్థితులను క్షేత్రస్థాయిలో పరిశీలించారు. అంధకారంలో స్మశాన వాటిక: ఈ సందర్భంగా కౌన్సిలర్లు మాట్లాడుతూ.. పట్టణంలో అన్ని చోట్లా సమస్యలు ఉన్నట్టే, ఈ స్మశాన వాటిక కూడా పాలనా వైఫల్యానికి అద్దం పడుతోందని విమర్శించారు. చీకటి పడితే కరెంటు కనెక్షన్ లేకపోవడంతో అంత్యక్రియల సమయంలో ప్రజలు నరకయాతన అనుభవిస్తున్నారని మండిపడ్డారు. విద్యుత్ స్తంభాలు దెబ్బతిన్నా, వైర్లు తెగిపోయినా కనీసం మరమ్మతులు చేసే నాథుడే కరువయ్యారని ధ్వజమెత్తారు. నిధుల దుర్వినియోగంపై ప్రశ్నలు: గత పాలక వర్గం స్మశాన వాటిక అభివృద్ధి కోసం కోట్ల రూపాయల నిధులు కేటాయించినట్లు రికార్డుల్లో చూపిస్తోందని, కానీ క్షేత్రస్థాయిలో ఒక్క పని కూడా సరిగ్గా జరగలేదని వారు ఆరోపించారు. "ఇది కాంట్రాక్టు చేసిన వారి తప్పిదమా? లేక బిల్లులు రికార్డు చేసిన అధికారుల నిర్లక్ష్యమా?" అని వారు ప్రశ్నించారు. వర్షాలకు కొట్టుకుపోయిన రోడ్లు, అధ్వాన్నంగా మారిన దారి కారణంగా స్మశాన వాటిక లోపలికి వాహనం వెళ్లే పరిస్థితి కూడా లేకపోవడం దారుణమని అన్నారు.అంత్యక్రియల సమయంలో ప్రజలకు ఎదురవుతున్న ఇబ్బందులను దృష్టిలో ఉంచుకుని,జిల్లా కలెక్టర్ వెంటనే స్పందించి తగిన చర్యలు తీసుకోవాలని డిమాండ్ చేశారు.నిధుల వినియోగంపై విచారణ జరిపి,వెంటనే రోడ్డు సౌకర్యం, విద్యుత్ దీపాలు మరియు ఇతర కనీస వసతులు కల్పించాలని కోరారు. ఈ కార్యక్రమంలో పలువురు బీజేపీ నాయకులు,కార్యకర్తలు పాల్గొన్నారు.