కామారెడ్డిలో ‘ఆపరేషన్ కవచ్’ మెరుపు దాడి: జంతువుల అక్రమ వేటగాళ్ల ముఠా గుట్టురట్టు – 8 మంది అరెస్ట్..

'ఆపరేషన్ కవచ్'లో కామారెడ్డి పోలీసుల పంజా: జంతువుల అక్రమ వేటగాళ్ల ముఠా గుట్టురట్టు – 8 మంది అరెస్ట్..

ఎస్ ఆర్ ఎస్ న్యూస్: కామారెడ్డి జిల్లా..

జిల్లాలో శాంతిభద్రతల పరిరక్షణ, నేరాల నియంత్రణ మరియు చట్టవ్యతిరేక కార్యకలాపాల నిర్మూలనే లక్ష్యంగా జిల్లా ఎస్పీ ఎం. రాజేష్ చంద్ర, ఐపీఎస్ నేతృత్వంలో ప్రతిష్టాత్మకంగా నిర్వహిస్తున్న "ఆపరేషన్ కవచ్" మరో కీలక విజయాన్ని సాధించింది. అడవి జంతువుల అక్రమ వేట కోసం నాటుతుపాకులను ఉపయోగిస్తున్న ఒక ముఠాను గాంధారి పోలీసులు అరెస్ట్ చేశారు. కేసు వివరాలు: తేదీ 24.06.2026 రాత్రి గాంధారి ఎస్ఐ మహేందర్ మరియు సిబ్బంది మొండి సడక్ చౌరస్తా వద్ద వాహన తనిఖీలు నిర్వహిస్తుండగా, రెండు మోటార్ సైకిళ్లపై అనుమానాస్పదంగా వచ్చిన ఐదుగురు వ్యక్తులను వెంబడించి పట్టుకున్నారు. వారి వద్ద అక్రమ నాటుతుపాకులు, గన్‌పౌడర్, స్టీల్ పెలెట్స్ వంటి ప్రమాదకర వేట సామగ్రి లభించాయి. జిల్లా ఎస్పీ ఆదేశాల మేరకు, ఎల్లారెడ్డి డీఎస్పీ పర్యవేక్షణలో ప్రత్యేక బృందాలు రంగంలోకి దిగి లోతైన దర్యాప్తు చేపట్టాయి. నిందితుల విచారణలో వెల్లడైన వివరాల ప్రకారం: నిందితులు మూడు నెలల క్రితం బాన్సువాడ మండలం చిన్నరాంపూర్ గ్రామానికి చెందిన అస్లాం చావుస్ వద్ద ఒక్కో నాటుతుపాకీని రూ.10,000/- చొప్పున కొనుగోలు చేశారు. మొత్తం 5 నాటుతుపాకులలో మూడింటిని గండివేట్ తండా సమీపంలో దాచిపెట్టినట్లు చెప్పడంతో, పోలీసులు వాటిని రికవరీ చేశారు. ఈ నెట్‌వర్క్‌లో భాగంగా అక్రమ ఆయుధాలను సరఫరా చేసిన ప్రధాన నిందితుడు అస్లాం చావుస్‌తో పాటు మిగిలిన వారిని పోలీసులు అదుపులోకి తీసుకున్నారు. స్వాధీనం చేసుకున్న సామగ్రి: నాటుతుపాకులు: 5, ఎయిర్ గన్: 1, ట్రిగ్గర్ మెకానిజంలు: 3, చాప్స్ (Barrels): 3 భారీగా మందుగుండు సామాగ్రి (గన్‌పౌడర్, పొటాష్, స్టీల్ పెలెట్స్) వాహనాలు: 2 మోటార్ సైకిళ్లు అరెస్ట్ అయిన నిందితులు: విస్లావత్ అరుణ్, విస్లావత్ గోపిచంద్, ఆంగోత్ లక్ష్మణ్, విస్లావత్ నాను, విస్లావత్ గణేష్ (అందరూ గండివేట్ తండా), సలావత్ చందర్ (హజీపూర్), ఆంగోత్ ధర్మ నాయక్ (సంగారెడ్డి జిల్లా), అస్లాం చావుస్ (చిన్నరాంపూర్). అభినందనలు: ఈ ఆపరేషన్‌లో సమర్థవంతంగా పనిచేసిన సదాశివనగర్ సీఐ బి. సంతోష్ కుమార్, గాంధారి ఎస్‌ఐ మహేందర్, తాడ్వాయి ఎస్ఐ నరేష్ మరియు పోలీస్ సిబ్బందిని ఎస్పీ ఎం. రాజేష్ చంద్ర ప్రత్యేకంగా అభినందించి నగదు పురస్కారాలు అందజేశారు. ఎస్పీ హెచ్చరిక: జిల్లాలో అక్రమ ఆయుధాల సంస్కృతికి, వన్యప్రాణుల వేటకు తావులేదని ఎస్పీ స్పష్టం చేశారు. నేరస్థులకు "ఆపరేషన్ కవచ్" సింహస్వప్నంగా మారుతుందని, చట్టవ్యతిరేక చర్యలపై ఉక్కుపాదం మోపుతామని హెచ్చరించారు.