భూవివాదంలో హత్యాయత్నం: కాంగ్రెస్ జిల్లా ప్రధాన కార్యదర్శి రంగు రవీందర్ గౌడ్ పై ఆరోపణలు
భూవివాదంలో హత్యాయత్నం: కాంగ్రెస్ జిల్లా ప్రధాన కార్యదర్శి రంగు రవీందర్ గౌడ్ పై ఆరోపణలు
ఎస్ ఆర్ ఎస్ న్యూస్:రామారెడ్డి, సెప్టెంబర్ 3:
కామారెడ్డి జిల్లా రామారెడ్డి మండలంలో భూవివాదం రక్తపాతానికి దారితీసింది. ప్లాటు హద్దులు ఏర్పాటు చేసుకుంటున్న వ్యక్తిపై కాంగ్రెస్ పార్టీ జిల్లా ప్రధాన కార్యదర్శి, మాజీ సర్పంచ్ రంగు రవీందర్ గౌడ్ మరియు అతని తమ్ముడు రాజశేఖర్ గౌడ్ ప్రాణాంతక దాడికి పాల్పడ్డట్లు బాధితుడు ఆరోపించారు. ఈ ఘటన స్థానికంగా తీవ్ర సంచలనం రేపింది. బాధితుడు సుప్పని రవి తెలిపిన వివరాల ప్రకారం.. రామారెడ్డి గ్రామంలో అతనికి చెందిన 600 చదరపు గజాల ప్లాటు వద్ద గత కొంతకాలంగా వివాదం నడుస్తోంది. ఇదే విషయమై సెప్టెంబర్ 3వ తేదీన బాధితుడు తన స్థలంలో హద్దురాళ్లు పాతుకుంటున్న సమయంలో, రంగు రవీందర్ గౌడ్, రాజశేఖర్ గౌడ్ ఇద్దరు అక్కడికి చేరుకున్నారు. ముందస్తు పథకం ప్రకారమే తనను హత్య చేయాలనే ఉద్దేశంతో దౌర్జన్యానికి దిగారని బాధితుడు వాపోయాడు. రాజశేఖర్ గౌడ్ వెనుక నుంచి తనను గట్టిగా పట్టుకోగా, రంగు రవీందర్ గౌడ్ తన తలపై హైడర్ రాళ్లతో బలంగా కొట్టాడని, దీంతో తీవ్ర గాయాలయ్యాయని సుప్పని రవి తెలిపారు. తన ప్రాణాలను తీసేందుకు ప్రయత్నించిన ఈ ఇద్దరు అన్నదమ్ములపై కఠిన చర్యలు తీసుకోవాలని, తనకు తక్షణమే న్యాయం చేయాలని ఆయన పోలీసులను వేడుకున్నారు. ఈ ఘటనపై బాధితుడు రామారెడ్డి పోలీస్ స్టేషన్‌లో ఫిర్యాదు (కంప్లైంట్) చేసినట్లు తెలిపారు. అధికార పార్టీకి చెందిన నాయకుడు కావడంతో పోలీసులు ఎలాంటి ఒత్తిళ్లకు తలవంచకుండా నిష్పక్షపాతంగా దర్యాప్తు జరిపి, దోషులను చట్టపరంగా శిక్షించాలని బాధితుడితో పాటు స్థానికులు డిమాండ్ చేస్తున్నారు.