కామారెడ్డిలో ప్రశాంతంగా గణేష్ నిమజ్జన శోభాయాత్రకు సర్వం సిద్ధం: ఎస్పీ రాజేష్ చంద్ర
కామారెడ్డిలో ప్రశాంతంగా గణేష్ నిమజ్జన శోభాయాత్రకు సర్వం సిద్ధం: ఎస్పీ రాజేష్ చంద్ర
ఎస్ ఆర్ ఎస్ న్యూస్:కామారెడ్డి
కామారెడ్డి పట్టణంలో గణేష్ నిమజ్జన శోభాయాత్రను అత్యంత ప్రశాంతంగా, సురక్షితంగా నిర్వహించేందుకు జిల్లా పోలీసు శాఖ సర్వసన్నద్ధమైంది. ఎలాంటి అవాంఛనీయ సంఘటనలకు తావులేకుండా పటిష్టమైన భద్రతా ఏర్పాట్లు పూర్తి చేసినట్లు జిల్లా ఎస్పీ ఎం.రాజేష్ చంద్ర, ఐపీఎస్ తెలిపారు. ఈ మేరకు జిల్లా పోలీస్ కార్యాలయం నుంచి మంగళవారం ఒక అధికారిక ప్రకటన వెలువడింది. డ్రోన్లు, సీసీ కెమెరాలతో నిఘా నీడలో శోభాయాత్ర: శోభాయాత్ర సాగే ప్రధాన మార్గాలు, రద్దీ ప్రాంతాలు, జంక్షన్లు మరియు నిమజ్జన ఘాట్ల వద్ద పూర్తి స్థాయి నిఘా ఏర్పాటు చేసినట్లు ఎస్పీ తెలిపారు. మొత్తం 420 మంది పోలీసు అధికారులు మరియు సిబ్బందితో గట్టి బందోబస్తు నిర్వహిస్తున్నామని, శోభాయాత్ర రూట్‌లో అదనంగా 162 సీసీ కెమెరాలు, 3 డ్రోన్ కెమెరాలతో నిరంతరం పర్యవేక్షించనున్నట్లు పేర్కొన్నారు. అవసరమైన చోట ప్రత్యేక బారికేడింగ్, ట్రాఫిక్ డైవర్షన్లు అమలు చేస్తున్నట్లు చెప్పారు. భక్తులకు, నిర్వాహకులకు పోలీసు శాఖ కీలక సూచనలు:
- మద్యం నిషేధం: శోభాయాత్రలో పాల్గొనేవారు లేదా వాహనాలు నడిపేవారు ఎట్టి పరిస్థితుల్లోనూ మద్యం సేవించరాదు.
- నిబంధనల పాటింపు: డీజేలు, సౌండ్ సిస్టమ్స్‌కు సంబంధించి ప్రభుత్వం నిర్దేశించిన శబ్ద పరిమితులను తప్పనిసరిగా పాటించాలి.
- నీటి భద్రత: నిమజ్జన ప్రాంతాల వద్ద పిల్లలు, ఈత రానివారు నీటిలోకి దిగకుండా తల్లిదండ్రులు, మండప నిర్వాహకులు ప్రత్యేక జాగ్రత్తలు తీసుకోవాలి.
- సంయమనం: ఎలాంటి వివాదాలకు తావివ్వకుండా, ఇతరులను రెచ్చగొట్టే నినాదాలు చేయకుండా ప్రశాంత వాతావరణాన్ని కాపాడాలి. డయల్ 112కు సమాచారం ఇవ్వండి: ఎక్కడైనా అనుమానాస్పద వ్యక్తులు లేదా వస్తువులు కనిపిస్తే, అలాగే ఎలాంటి అత్యవసర పరిస్థితి తలెత్తినా వెంటనే సమీపంలోని పోలీసులకు లేదా డయల్ 112 నంబర్‌కు సమాచారం అందించాలని ఎస్పీ ప్రజలను కోరారు. “భక్తి మనసులో… బాధ్యత మన చేతుల్లో.. సమిష్టి సహకారంతో సురక్షితమైన గణేష్ నిమజ్జనం” అన్న నినాదంతో గణేష్ మండపాల నిర్వాహకులు, భక్తులు అందరూ పోలీసు శాఖకు సంపూర్ణ సహకారం అందించి వేడుకలను విజయవంతం చేయాలని ఎస్పీ విజ్ఞప్తి చేశారు. జిల్లా వ్యాప్తంగా అన్ని మండల కేంద్రాల్లోనూ ఇదేరీతిలో ముందస్తు భద్రతా చర్యలు చేపట్టినట్లు ఆయన వెల్లడించారు.