"వడ్ల లారీని అడ్డగించి డబ్బులు డిమాండ్ చేసిన నలుగురు విలేకరులు అరెస్ట్"

విలేకరులమని బెదిరించి.. వడ్ల లారీని అడ్డగించిన నలుగురు అరెస్ట్

ఎస్ ఆర్ ఎస్ న్యూస్:ఎల్లారెడ్డి

వడ్ల లోడ్‌తో వెళ్తున్న లారీని అడ్డగించి, తాము విలేకరులమంటూ డ్రైవర్‌ను బెదిరించి నగదు డిమాండ్ చేసిన నలుగురు నిందితులను ఎల్లారెడ్డి పోలీసులు అరెస్ట్ చేశారు.ఎల్లారెడ్డి సబ్ డివిషనల్ పోలీస్ కార్యాలయంలో డీఎస్పీ ఎస్. శ్రీనివాసరావు ఈ కేసుకు సంబంధించిన వివరాలను మీడియాకు వెల్లడించారు. ఘటన వివరాలు: ఫిర్యాదుదారుడు చకినాల సురేందర్ ఇచ్చిన ఫిర్యాదు ప్రకారం.. ఈ నెల సెప్టెంబర్ 26వ తేదీ రాత్రి మల్లయ్యపల్లి గ్రామ శివారులోని పోచారం కెనాల్ సమీపంలో వడ్ల లోడ్‌తో వెళ్తున్న లారీని (TS05UD4689) ఓ వ్యాగనర్ కారులో వచ్చిన నిందితులు అడ్డుకున్నారు. లారీకి సంబంధించిన పత్రాలు చూపించాలని డ్రైవర్‌ను డిమాండ్ చేశారు. పత్రాలు చూపించకపోతే నలుగురికి ఒక్కొక్కరికి రూ. 30,000 చొప్పున మొత్తం రూ. 1,20,000 ఇవ్వాలని బెదిరించారు. డబ్బులు ఇవ్వకపోతే చంపుతామని, పోలీసులకు పట్టించి కేసులు పెట్టిస్తామని భయభ్రాంతులకు గురిచేశారు. బాధితుడి ఫిర్యాదు మేరకు ఎల్లారెడ్డి పోలీస్ స్టేషన్‌లో కేసు నమోదు చేసి దర్యాప్తు చేపట్టారు. పోలీసుల ప్రత్యేక బృందాల దర్యాప్తు: జిల్లా ఎస్పీ ఎం.రాజేష్ చంద్ర ఆదేశాల మేరకు, ఎల్లారెడ్డి డీఎస్పీ పర్యవేక్షణలో సీఐ, ఎస్‌ఐలతో రెండు ప్రత్యేక బృందాలను ఏర్పాటు చేసి నిందితులను త్వరితగతిన గుర్తించారు. వారి నుంచి నేరానికి ఉపయోగించిన వ్యాగనర్ కారుతో పాటు 4 సెల్‌ఫోన్లను స్వాధీనం చేసుకున్నారు.

అరెస్టైన నిందితులు వీరే:

• మహమ్మద్ అబ్దుల్ మోసిన్ (27) - బాన్సువాడ (బతుకమ్మ ప్రింట్ మీడియా రిపోర్టర్)

• ఎడ్ల మహేష్ కుమార్ - బాన్సువాడ (జనహితం ఈ-పేపర్ & M-2 న్యూస్ యూట్యూబ్ ఛానల్ రిపోర్టర్)

• బుద్దే ఆనంద్ - మీర్జాపూర్ (జనసాక్షిక ఈ-పేపర్ రిపోర్టర్)

• గాండ్ల సుధీర్ కుమార్ - బాన్సువాడ (మనం న్యూస్ పేపర్ స్టాఫ్ రిపోర్టర్)

ఎస్పీ హెచ్చరిక:

చాకచక్యంగా వ్యవహరించి నిందితులను అరెస్ట్ చేసిన ఎల్లారెడ్డి పోలీసులను జిల్లా ఎస్పీ అభినందించారు. ఏ వృత్తిలో ఉన్నా, ఏ హోదాను అడ్డుపెట్టుకున్నా చట్టాన్ని ఉల్లంఘించి నేరాలకు పాల్పడేవారు ఎట్టి పరిస్థితుల్లోనూ చట్టపరమైన చర్యల నుంచి తప్పించుకోలేరని ఆయన హెచ్చరించారు. ఈ కేసుకు సంబంధించి మరింత దర్యాప్తు కొనసాగుతోందని డీఎస్పీ తెలిపారు.