హత్యాయత్నం కేసులో రౌడీ షీటర్ అరెస్ట్ – తల్వార్ స్వాధీనం, రిమాండ్‌కు తరలింపు..

హత్యాయత్నం కేసులో రౌడీ షీటర్ అరెస్ట్ – తల్వార్ స్వాధీనం, రిమాండ్‌కు తరలింపు..

ఎస్ ఆర్ ఎస్ న్యూస్:కామారెడ్డి..

శాంతిభద్రతలకు భంగం కలిగించే అసాంఘిక శక్తులపై కామారెడ్డి పోలీసులు ఉక్కుపాదం మోపుతున్నారు. తాజాగా చోటుచేసుకున్న హత్యాయత్నం కేసులో ఓ రౌడీ షీటర్‌ను అరెస్ట్ చేసి, నేరానికి ఉపయోగించిన ఆయుధాన్ని స్వాధీనం చేసుకున్నట్లు కామారెడ్డి డీఎస్పీ మధుసూదన్ వెల్లడించారు. కేసు వివరాలు: ఫిర్యాదుదారుడు మహమ్మద్ అర్షద్ ఇచ్చిన ఫిర్యాదు మేరకు, గత పాత కక్షల నేపథ్యంలో నిందితుడు అబ్దుల్ సల్మాన్ ఖాన్, తేది 22-06-2026 రాత్రి సమయంలో బాధితుడి ఇంటిపై దాడి చేశాడు. ఇంటి ముందున్న ఆటో రిక్షాను, విద్యుత్ మీటర్‌ను ధ్వంసం చేసి, ఫిర్యాదుదారుడు మరియు అతని భార్యపై రాయితో దాడి చేయడమే కాకుండా, తల్వార్‌తో హత్యాయత్నానికి పాల్పడ్డాడు. వెంటనే స్పందించిన కామారెడ్డి టౌన్ పోలీసులు కేసు నమోదు చేసి, దర్యాప్తు చేపట్టారు. బతుకమ్మ కుంట ప్రాంతంలో నిందితుడిని అదుపులోకి తీసుకుని, అతని వద్ద ఉన్న 57 సెం.మీ పొడవు గల తల్వార్‌ను స్వాధీనం చేసుకున్నారు. నేర చరిత్ర: నిందితుడు అబ్దుల్ సల్మాన్ ఖాన్ కామారెడ్డి టౌన్ పోలీస్ స్టేషన్ పరిధిలోని రౌడీ షీటర్ అని, గతంలో హత్యాయత్నం సహా 5 క్రిమినల్ కేసుల్లో నిందితుడిగా ఉన్నట్లు విచారణలో తేలింది. భారత ఆయుధాల చట్టం-1959 సెక్షన్ 25(1B)(b) కింద కేసు నమోదు చేసి, నిందితుడిని రిమాండ్‌కు తరలిస్తున్నట్లు డీఎస్పీ తెలిపారు. పోలీసుల హెచ్చరిక: "శాంతిభద్రతలకు విఘాతం కలిగించే గూండాలు, రౌడీ షీటర్ల పట్ల కఠినంగా వ్యవహరిస్తాం. ఎట్టి పరిస్థితుల్లోనూ అక్రమ ఆయుధాల వినియోగాన్ని, బెదిరింపులను ఉపేక్షించబోం," అని డీఎస్పీ స్పష్టం చేశారు. ఏదైనా అనుమానాస్పద సమాచారం ఉంటే వెంటనే పోలీసులకు తెలియజేయాలని, సమాచారం అందించేవారి వివరాలు గోప్యంగా ఉంచుతామని ప్రజలకు సూచించారు. ఈ కేసును సమర్థవంతంగా దర్యాప్తు చేసి, నిందితుడిని పట్టుకున్న కామారెడ్డి టౌన్ ఎస్‌హెచ్‌ఓ నరహరి, ఎస్సై సాయి కృష్ణ మరియు సిబ్బందిని జిల్లా ఎస్పీ అభినందించారు.