సమాచార హక్కు చట్టం అమలులో పారదర్శకత పాటించాలి: వి.సుశీల్‌ కుమార్‌
ప్రభుత్వ కార్యాలయాల్లో సెక్షన్‌ 4(1)(బి) సమాచారం విధిగా ప్రదర్శించాలి: సీసీఆర్‌ జిల్లా ప్రతినిధి వి.సుశీల్‌ కుమార్‌
ఎస్ ఆర్ ఎస్ న్యూస్:కామారెడ్డి
ప్రభుత్వ కార్యాలయాల్లో పారదర్శకత, జవాబుదారీతనం పెంపొందించేందుకు సమాచార హక్కు చట్టం–2005లోని సెక్షన్‌ 4(1)(బి) నిబంధనను కచ్చితంగా అమలు చేయాలని కౌన్సిల్‌ ఫర్‌ సిటిజన్‌ రైట్స్‌ (సీసీఆర్‌) కామారెడ్డి జిల్లా ప్రతినిధి వి.సుశీల్‌ కుమార్‌ డిమాండ్ చేశారు. గ్రామ పంచాయతీ స్థాయి నుంచి మండల, జిల్లా, రాష్ట్ర స్థాయి కార్యాలయాలతో పాటు కేంద్ర ప్రభుత్వ పరిధిలోని అన్ని ప్రజా ప్రాధికార సంస్థలు ఈ చట్టబద్ధమైన బాధ్యతను విధిగా నిర్వర్తించాలని ఆయన ఒక ప్రకటనలో కోరారు. 17 రకాల అంశాల ప్రదర్శన తప్పనిసరి చట్టంలోని సెక్షన్‌ 4(1)(బి) ప్రకారం ప్రతి కార్యాలయం 17 ప్రాథమిక అంశాల వివరాలను ప్రజలకు సులభంగా అందుబాటులో ఉంచాలని సుశీల్‌ కుమార్‌ స్పష్టం చేశారు. ఇందులో సంస్థ విధులు, అధికారులు–ఉద్యోగుల అధికారాలు, నిర్ణయ ప్రక్రియ, నియమ నిబంధనలు, రికార్డులు, ఉద్యోగుల వివరాలు, వేతనాలు, బడ్జెట్–వ్యయాలు, సబ్సిడీలు–లబ్ధిదారులు, రాయితీలు, అనుమతులు తదితర వివరాలు ఉండాలని పేర్కొన్నారు. అధికారుల వివరాల వెల్లడి కార్యాలయాల్లో ప్రజలకు సమాచారం అందించేందుకు నియమితులైన పీఐఓ (PIO), ఏపీఐఓ (APIO), ఎఫ్‌ఏఏ (FAA) అధికారుల పేర్లు, హోదాలు మరియు సంప్రదింపు వివరాలను నోటీసు బోర్డులపై, అధికారిక వెబ్‌సైట్లలో స్పష్టంగా ప్రదర్శించాలని సూచించారు. కార్యాలయాల్లో బదిలీలు లేదా ఇతర మార్పులు జరిగినప్పుడు సమాచారాన్ని ఎప్పటికప్పుడు అప్‌డేట్ చేయాలని ఆయన విజ్ఞప్తి చేశారు.