ఏసీబీకి చిక్కిన రాజంపేట ఎస్సై.. రూ.30 వేలు లంచం తీసుకుంటూ రెడ్ హ్యాండెడ్‌గా పట్టివేత
ఏసీబీకి చిక్కిన రాజంపేట ఎస్సై.. రూ.30 వేలు లంచం తీసుకుంటూ రెడ్ హ్యాండెడ్‌గా పట్టివేత
ఎస్ ఆర్ ఎస్ న్యూస్:కామారెడ్డి, ఆగస్టు 20:
కామారెడ్డి జిల్లాలో అవినీతి నిరోధక శాఖ (ఏసీబీ) అధికారులు మరోసారి పంజా విసిరారు. సిమెంట్ దుకాణ వివాదానికి సంబంధించి బాధితుడి నుంచి రూ.30 వేలు లంచం తీసుకుంటూ రాజంపేట ఎస్సై ఆంజనేయులు ఏసీబీ అధికారులకు రెడ్ హ్యాండెడ్‌గా చిక్కారు. వివరాల్లోకి వెళితే.. రాజంపేట మండలానికి చెందిన సిద్ధిరాములు అనే వ్యక్తికి సంబంధించిన సిమెంట్ దుకాణ వివాదాన్ని పరిష్కరించే నిమిత్తం ఎస్సై ఆంజనేయులు రూ.50,000 లంచం డిమాండ్ చేసినట్లు సమాచారం. ఇందులో భాగంగానే ఇప్పటికే ప్రథమ కింద రూ.10,000 తీసుకున్న ఎస్సై.. గురువారం మధ్యాహ్నం కామారెడ్డి జిల్లా కేంద్రంలోని ఎన్జీవోస్ కాలనీలో ఉన్న తన నివాసంలో మరో రూ.30,000 నగదు తీసుకుంటుండగా ఏసీబీ అధికారులు మెరుపు దాడి చేసి పట్టుకున్నారు. ప్రస్తుతం ఎస్సై నివాసంలో ఏసీబీ అధికారులు విస్తృతంగా తనిఖీలు నిర్వహిస్తున్నారు. కార్యాలయానికి సంబంధించిన రికార్డులు, ఫైళ్లను పరిశీలిస్తూ లోతైన విచారణ జరుపుతున్నారు. గతంలోనూ కామారెడ్డి జిల్లాలో లింగంపేట ఎస్సై ఏసీబీకి చిక్కిన ఘటన మరచిపోకముందే, తాజాగా రాజంపేట ఎస్సై కూడా అవినీతి నిరోధక శాఖకు పట్టుబడడం స్థానిక పోలీసు శాఖలో కలకలం రేపుతోంది.