ప్రభుత్వ నిబంధనల ప్రకారం ధాన్యం కొనుగోలు ప్రక్రియను వేగవంతం చేయాలి..

ప్రభుత్వ నిబంధనల ప్రకారం ధాన్యం కొనుగోలు ప్రక్రియను వేగవంతం చేయాలి..

వీడియో కాన్ఫరెన్స్‌లో ముఖ్యమంత్రి ఎనుముల రేవంత్ రెడ్డి ఆదేశం...

జిల్లాలో TAB ఎంట్రీలు, రవాణాపై ప్రత్యేక దృష్టి సారించిన కలెక్టర్ ఆశిష్ సంగ్వాన్..

ఎస్ ఆర్ ఎస్ న్యూస్: కామారెడ్డి...

రాష్ట్రంలోని రైతుల సంక్షేమమే ధ్యేయంగా ప్రభుత్వం నిర్వహిస్తున్న కొనుగోలు కేంద్రాల ద్వారా వరి ధాన్యం, మొక్కజొన్న సేకరణను నిబంధనల ప్రకారం వేగవంతం చేయాలని రాష్ట్ర ముఖ్యమంత్రి ఎనుముల రేవంత్ రెడ్డి అధికారులను ఆదేశించారు. మంగళవారం హైదరాబాద్ నుండి మంత్రులు మరియు ఉన్నతాధికారులతో కలిసి ముఖ్యమంత్రి అన్ని జిల్లాల కలెక్టర్లతో వీడియో కాన్ఫరెన్స్ నిర్వహించారు. ముఖ్యమంత్రి ఆదేశాలలోని ముఖ్యాంశాలు: సజావుగా కొనుగోళ్లు: రాష్ట్రవ్యాప్తంగా వరి ధాన్యం, మొక్కజొన్న కొనుగోళ్లు ఎటువంటి ఆటంకాలు లేకుండా సాగాలి.ధాన్యం రవాణాలో జాప్యం జరగకుండా ముందస్తు చర్యలు తీసుకోవాలి. సౌకర్యాల కల్పన:కొనుగోలు కేంద్రాలలో గోనె సంచులు, టార్పాలిన్లు, క్లీనింగ్ మెషీన్లు సమృద్ధిగా ఉంచాలి. నిర్లక్ష్యం వహిస్తే క్రిమినల్ కేసులు: హమాలీల సమస్యలు రాకుండా చూడాల్సిన బాధ్యత గుత్తేదారులదేనని, ప్రభుత్వ మార్గదర్శకాలు ఉల్లంఘిస్తే వారిపై క్రిమినల్ కేసులు నమోదు చేయాలని సీఎం హెచ్చరించారు. ప్రత్యామ్నాయ ఏర్పాట్లు: గోదాముల కొరత ఉన్న చోట ఫంక్షన్ హాళ్లు, రైతు బజార్లను వినియోగించుకోవాలి. లారీల కొరత ఉంటే ట్రాక్టర్ల ద్వారా రవాణా చేపట్టాలి. మిల్లర్లకు స్పష్టత:ధాన్యం కేవలం కొనుగోలు కేంద్రాల ద్వారానే రావాలని, నేరుగా మిల్లులకు తరలించవద్దని స్పష్టం చేశారు. జిల్లా కలెక్టర్ ఆశిష్ సంగ్వాన్ సమీక్ష.. ముఖ్యమంత్రి వీడియో కాన్ఫరెన్స్ అనంతరం జిల్లా కలెక్టర్ అధికారులతో సమీక్ష నిర్వహించారు. జిల్లాలో కొనుగోలు ప్రక్రియపై ఆయన పలు సూచనలు చేశారు. తక్షణ TAB ఎంట్రీలు: పెండింగ్‌లో ఉన్న TAB ఎంట్రీలను వెంటనే పూర్తి చేయాలని, తద్వారా రైతులకు మద్దతు ధర (MSP) ఆలస్యం కాకుండా చూడాలని DCO, DRDA అధికారులను ఆదేశించారు. లిఫ్టింగ్ వేగవంతం: PPCల వద్ద సరిపడా వాహనాలు ఉండేలా చూసి, ధాన్యం లిఫ్టింగ్‌ను వేగవంతం చేయాలని డిస్ట్రిక్ట్ మేనేజర్లకు సూచించారు. అకాల వర్షాల పట్ల అప్రమత్తత: వాతావరణ మార్పుల దృష్ట్యా ధాన్యం రక్షణ కోసం అన్ని కేంద్రాల వద్ద టార్పాలిన్లు సిద్ధంగా ఉంచాలని DMOను ఆదేశించారు. ఈ కార్యక్రమంలో జిల్లా అదనపు కలెక్టర్లు విక్టర్, గిరి, సివిల్ సప్లై అధికారి వెంకటేష్, DCO రామ్మోహన్, వ్యవసాయ శాఖ అధికారి జ్యోతి మరియు ఇతర శాఖల అధికారులు పాల్గొన్నారు.