అంధకారంలో గాంధీ గంజ్ రైతు మార్కెట్ ప్రాంతం.. పట్టిపించుకోని అధికారులు

అంధకారంలో గాంధీ గంజ్ రైతు మార్కెట్ ప్రాంతం.. పట్టిపించుకోని అధికారులు

• చెట్లను నరికి ఆరు రోజులు గడిచినా పునరుద్ధరించని వీధి దీపాలు

• పేరుకుపోయిన చెత్తతో తీవ్ర దుర్గంధం.. భయాందోళనలో రైతులు, స్థానికులు

ఎస్ ఆర్ ఎస్ న్యూస్:కామారెడ్డి

కామారెడ్డి పట్టణంలోని గాంధీ గంజ్ రైతు మార్కెట్ సమీప ప్రాంతం సమస్యల వలయంలో చిక్కుకుంది. విద్యుత్ స్తంభాల ఏర్పాటు పనుల నిమిత్తం గత నాలుగైదు రోజులుగా అక్కడ చెట్లను నరికారు. అయితే, ఆ పనుల కారణంగా ఆ ప్రాంతంలో వీధి దీపాలు వెలగకపోవడంతో రాత్రివేళల్లో రోడ్లన్నీ పూర్తిగా అంధకారంలోకి వెళ్లిపోయాయి. దీంతో మార్కెట్ ప్రాంతానికి వచ్చే రైతులు, కూరగాయల వ్యాపారులు మరియు స్థానిక నివాసితులు తీవ్ర ఇబ్బందులు పడుతున్నారు. చీకటిమయం కావడంతో అసాంఘిక కార్యకలాపాలు జరుగుతాయనే భయంతో పాటు, పాములు లేదా ఇతర కీటకాల సంచారం ఉంటుందనే ఆందోళనలో ప్రజలు బిక్కుబిక్కుమంటూ గడుపుతున్నారు. మరోవైపు, ఇదే ప్రాంతంలో ఎక్కడికక్కడ చెత్తాచెదారం పేరుకుపోయి తీవ్రమైన దుర్గంధం వెలువడుతున్నా మున్సిపల్ అధికారులు పట్టించుకోవడం లేదనే విమర్శలు వ్యక్తమవుతున్నాయి. పారిశుద్ధ్య లోపం వల్ల వ్యాపారులు, వినియోగదారులు అనారోగ్యాల బారిన పడే ప్రమాదం ఉందని వాపోతున్నారు. ఇప్పటికైనా సంబంధిత విద్యుత్ మరియు మున్సిపల్ శాఖ అధికారులు స్పందించి, తక్షణమే వీధి దీపాలను పునరుద్ధరించాలని... చెత్తను తొలగించి పారిశుద్ధ్యాన్ని మెరుగుపరచాలని స్థానికులు, రైతులు విజ్ఞప్తి చేస్తున్నారు.