ముందస్తు కుట్రతో వృద్ధురాలి హత్య: నిందితులను అరెస్ట్ చేసిన భిక్నూర్ పోలీసులు...

ముందస్తు కుట్రతో వృద్ధురాలి హత్య: నిందితులను అరెస్ట్ చేసిన భిక్నూర్ పోలీసులు...

ఎస్ ఆర్ ఎస్ న్యూస్ : భిక్నూర్/కామారెడ్డి జిల్లా బ్యూరో....

ఒంటరి మహిళలను లక్ష్యంగా చేసుకుని, అతి కిరాతకంగా హత్య చేసి దోపిడీకి పాల్పడుతున్న ఇద్దరు నిందితులను భిక్నూర్ పోలీసులు చాకచక్యంగా పట్టుకున్నారు. రాజంపేటలో జరిగిన 83 ఏళ్ల వృద్ధురాలి హత్య కేసును ఛేదించిన వివరాలను భిక్నూర్ సర్కిల్ ఇన్స్పెక్టర్ సంపత్ కుమార్ వెల్లడించారు. కేసు నేపథ్యం : మెదక్ జిల్లా బచ్చురాజుపల్లికి చెందిన సుశీల (83)అనే వృద్ధురాలు,గత నెల 29న కాచాపూర్‌లోని తన కూతురు ఇంటి నుండి స్వగ్రామానికి బయలుదేరి అదృశ్యమయ్యారు.ఆమె ఇంటికి చేరకపోవడంతో ఆందోళన చెందిన కుటుంబ సభ్యులు మే 1న భిక్నూర్ పోలీస్ స్టేషన్‌లో ఫిర్యాదు చేశారు. పోలీసుల దర్యాప్తు - సాంకేతిక పరిజ్ఞానం కామారెడ్డి జిల్లా ఎస్పీ ఎం. రాజేష్ చంద్ర, ఐపీఎస్ ఆదేశాల మేరకు ప్రత్యేక బృందాలు రంగంలోకి దిగాయి. సిఐ సంపత్ కుమార్ నేతృత్వంలో సీసీ కెమెరాల ఫుటేజ్‌ను క్షుణ్ణంగా విశ్లేషించి, ఆధునిక సాంకేతిక పరిజ్ఞానాన్ని ఉపయోగించి అనుమానితులను గుర్తించారు. నేరం జరిగిన తీరు (మోడస్ ఆపరేండీ) విచారణలో నిందితులు వెల్లడించిన నిజాలు దిగ్భ్రాంతికి గురిచేస్తున్నాయి: పథకం:నిందితులు మేడిని బసవయ్య,బుక్యా బూల ఇద్దరూ కూలీ పనులు చేస్తూ, సులభంగా డబ్బు సంపాదించేందుకు ఒంటరి మహిళలను దోచుకోవాలని కుట్ర పన్నారు. ట్రాప్: ఏప్రిల్ 29న రాజంపేట ప్రభుత్వ ఆసుపత్రి వద్ద వృద్ధురాలిని చూసిన బుక్యా బూల, ఆమె చేతికి ఉన్న వెండి కడాలను గమనించింది. మాటలతో నమ్మించి, ఆమెను కల్లు దుకాణానికి తీసుకెళ్లి బలవంతంగా కల్లు తాగించింది.అనంతరం నిందితులిద్దరూ కలిసి ఆమెను నిర్మానుష్యమైన పొలం వద్దకు తీసుకెళ్లారు. వృద్ధురాలు మత్తులో ఉండగా వెండి కడాలను దొంగిలించారు.మిగిలిన వస్తువులను తీయడం సాధ్యపడకపోవడంతో, సాక్ష్యం లేకుండా చేసేందుకు ఆమెను సమీపంలోని ఎండిపోయిన బావిలోకి నెట్టి హత్య చేశారు. నిందితుల వివరాలు..... 1.మేడిని బసవయ్య (53): రాజంపేట మండలం & గ్రామం. 2. బుక్యా బూల (27):షేర్ శంకర్ తాండ, రాజంపేట మండలం. పోలీసుల విజ్ఞప్తి: "అపరిచితులను గుడ్డిగా నమ్మడం ప్రమాదకరం. ముఖ్యంగా వృద్ధులు, మహిళలు ఒంటరి ప్రయాణాల సమయంలో అప్రమత్తంగా ఉండాలి. అనుమానాస్పద వ్యక్తులు కనిపిస్తే వెంటనే డయల్ 100 లేదా స్థానిక పోలీసులకు సమాచారం అందించాలి." పోలీసులు నిందితుల నుండి వెండి కడాలను స్వాధీనం చేసుకుని, వారిని రిమాండ్‌కు తరలించారు. అత్యంత వేగంగా కేసును ఛేదించిన పోలీసు బృందాన్ని జిల్లా ఎస్పీ అభినందించారు.