పేదల సంక్షేమమే ప్రజా ప్రభుత్వ ధ్యేయం: షబ్బీర్ అలీ
Ad
ప్రకటనల కోసం
ఈరోజే సంప్రదించండి!
అర్హులైన ప్రతి పేద కుటుంబానికి సంక్షేమ ఫలాలే ప్రభుత్వ లక్ష్యం
-
కామారెడ్డి మున్సిపాలిటీలో 797 మందికి నూతన ఆసరా పెన్షన్ల పంపిణీ
-
మరో 200కు పైగా దరఖాస్తుల పరిశీలనకు చర్యలు: ప్రభుత్వ సలహాదారు షబ్బీర్ అలీ
ఎస్ ఆర్ ఎస్ న్యూస్:కామారెడ్డి
సమాజంలోని పేదలు, వృద్ధులు, వితంతువులు, దివ్యాంగులు, ఒంటరి మహిళలకు ఆర్థిక భరోసా కల్పించి, అర్హులైన ప్రతి ఒక్కరికీ సంక్షేమ ఫలాలు అందించడమే ప్రజా ప్రభుత్వ ప్రధాన లక్ష్యమని రాష్ట్ర ప్రభుత్వ సలహాదారు మహమ్మద్ అలీ షబ్బీర్ స్పష్టం చేశారు. సోమవారం కామారెడ్డి మున్సిపల్ కార్యాలయంలో ఏర్పాటు చేసిన కార్యక్రమంలో నూతనంగా మంజూరైన ఆసరా పెన్షన్లను లబ్ధిదారులకు ఆయన పంపిణీ చేశారు. ఈ సందర్భంగా షబ్బీర్ అలీ మాట్లాడుతూ, కామారెడ్డి మున్సిపాలిటీ పరిధిలో వివిధ విభాగాలకు సంబంధించి రాష్ట్ర ప్రభుత్వం మొత్తం 797 నూతన ఆసరా పెన్షన్లను మంజూరు చేసిందని తెలిపారు. ఆర్థికంగా వెనుకబడి, కుటుంబ పోషణకు ఇతరులపై ఆధారపడే నిరుపేదలు సమాజంలో గౌరవప్రదంగా జీవించేందుకు ఈ పెన్షన్లు ఎంతో ఊతమిస్తాయని పేర్కొన్నారు. మరో 200 దరఖాస్తుల పరిశీలన: పట్టణ పరిధిలో ఇప్పటికే 797 పెన్షన్లు మంజూరు కాగా, మరో 200కు పైగా నూతన వినతిపత్రాలు అందాయని షబ్బీర్ అలీ వెల్లడించారు. వీటిని సంబంధిత అధికారులతో పరిశీలింపజేసి, నిబంధనల ప్రకారం అర్హులందరికీ పెన్షన్లు మంజూరయ్యేలా చర్యలు తీసుకుంటామని హామీ ఇచ్చారు. ప్రజలు తమ సమస్యల కోసం ప్రభుత్వ కార్యాలయాల చుట్టూ తిరిగే పరిస్థితి లేకుండా, ప్రజాప్రతినిధులు మరియు అధికారులు సమన్వయంతో పనిచేసి అర్హులైన ప్రతి లబ్ధిదారుడికి పథకాలు అందేలా చూడాలని సూచించారు. సంక్షేమం, అభివృద్ధికి సమప్రాధాన్యం: ముఖ్యమంత్రి రేవంత్ రెడ్డి నాయకత్వంలోని కాంగ్రెస్ ప్రభుత్వం సంక్షేమం, అభివృద్ధి అనే రెండు కళ్లుగా ముందుకు సాగుతోందని షబ్బీర్ అలీ అన్నారు. మహాలక్ష్మి ఉచిత బస్సు ప్రయాణం, రూ.500కే గ్యాస్ సిలిండర్, గృహజ్యోతి ద్వారా 200 యూనిట్ల ఉచిత విద్యుత్, ఇందిరమ్మ ఇళ్లు, రాజీవ్ ఆరోగ్యశ్రీ, రైతు భరోసా, రుణమాఫీ మరియు సన్నబియ్యం పంపిణీ వంటి పథకాలతో ప్రభుత్వం అన్ని వర్గాలకు అండగా నిలుస్తోందని వివరించారు. మహిళా సంఘాల బలోపేతం, యువతకు ఉపాధి కల్పనకు ప్రభుత్వం కట్టుబడి ఉందన్నారు. కామారెడ్డి అభివృద్ధికి ప్రత్యేక నిధులు: కామారెడ్డి నియోజకవర్గ సమగ్రాభివృద్ధికి ప్రత్యేక శ్రద్ధ తీసుకుంటున్నామని తెలిపారు. పట్టణంలో తాగునీటి సమస్యకు శాశ్వత పరిష్కారంగా అమృత్ (AMRUT) పథకం కింద రూ.93 కోట్లతో పనులు చేపడుతున్నామని, ఇందిరమ్మ ఇళ్లు, చెరువుల సుందరీకరణ, రహదారులు, డ్రైనేజీ వ్యవస్థల మెరుగుదలకు నిధులు మంజూరు చేశామని పేర్కొన్నారు. లబ్ధిదారులు పెన్షన్ డబ్బులను తమ ఆరోగ్యం, మందులు మరియు నిత్యావసరాలకు వినియోగించుకోవాలని సూచించారు. పాల్గొన్న ప్రముఖులు: ఈ కార్యక్రమంలో మున్సిపల్ చైర్పర్సన్ ఇప్ప ఉమారాణి శ్రీనివాస్, గ్రంథాలయ సంస్థ చైర్మన్ మద్ది చంద్రకాంత్ రెడ్డి, రాష్ట్ర యువజన కాంగ్రెస్ నాయకులు మహమ్మద్ ఇలియాస్, పట్టణ కాంగ్రెస్ అధ్యక్షులు ఐరేణి సందీప్, నాయకులు గూడెం శ్రీనివాస్ రెడ్డి, సుధాకర్ రెడ్డి, రామ్మోహన్, మాజీద్, వాజిద్, భూపతి, అంజద్, నిట్టు వెంకట్రావు, గంప ప్రసాద్, అజ్మత్, ఖదీర్, ఉరుదొండ ప్రవీణ్, సంతోష్ రావు, భరత్ టింకు, వడ్ల సురేష్, సోఫియాన్, డేవిడ్, అనిరుధ్లతో పాటు మున్సిపల్ అధికారులు, కాంగ్రెస్ నాయకులు, కార్యకర్తలు పెద్ద సంఖ్యలో పాల్గొన్నారు.